نیب نے حمزہ شہباز کو حراست میں لے لیا 11 جون 2019

  • Posted by Mian Zahoor ul Haq
  • at 1:02:00 AM -
  • 0 comments
لاہور ہائی کورٹ نے مسلم لیگ نون کے رہنما اور پنجاب اسمبلی میں قائد حزب اختلاف حمزہ شہباز کی عبوری ضمانت مسترد کردی جس کے بعد انہیں نیب نے حراست میں لے لیا، نیب کی ٹیم حمزہ شہباز کو لے کر نیب ہیڈکوارٹر کی جانب روانہ ہوگئی۔
مسلم لیگ نون کے رہنما اور پنجاب اسمبلی میں قائد حزب اختلاف حمزہ شہباز رمضان شوگر ملز، صاف پانی اور آمدن سے زائد اثاثہ جات کیسز میں عبوری ضمانت میں توسیع کے لیے لاہور ہائی کورٹ میں پیش ہوئے تھے۔
لاہور ہائی کورٹ کے ججز پر مشتمل 2 رکنی بینچ نے کیسز کی سماعت کی، نیب کی ٹیم اور نیب کے وکلاء بھی کمرۂ عدالت میں موجود تھے۔
دورانِ سماعت حمزہ شہباز کے وکیل سلمان اسلم بٹ نے حمزہ شہباز پر منی لانڈرنگ کے الزامات کے خلاف دلائل دیتے ہوئے کہا کہ عدالت حمزہ شہباز کی توہین عدالت کی درخواست پر بھی سماعت کرے۔
انہوں نے مزید کہا کہ نیب سے ایف ایم یو دستاویزات مانگی تھیں، تاہم نیب نے یہ نہیں دیں، نیب نے صرف گرفتاری کی وجوہات، انکوائری، انویسٹی گیشن کی دستاویزات دی ہیں۔
دوران سماعت عدالت نے حمزہ شہباز کی اپنے خلاف دستاویزات فراہم کرنے کی درخواست مسترد کر دی۔
نیب پراسیکیوٹرنے عدالت کو بتایا کہ شہباز شریف فیملی کے 1999ء میں اثاثے 50 ملین تھے، ان کےاثاثوں میں 380 ملین کا اضافہ ہوا، رقوم منتقل کرنے میں پاکستان سے 2 کمپنیاں ملوث ہیں۔
عدالت نے ریمارکس دیئے کہ باہرکیا باتیں ہو رہی ہیں، ہمیں کسی سےغرض نہیں، فیصلہ 100 فیصد قانون کے مطابق ہو گا۔
حمزہ شہباز کی پیشی کے موقع پر غیر متعلقہ افراد کا داخلہ عدالتی احاطے میں بند کر دیا گیا تھا جس کی وجہ سے مسلم لیگ نون کے کارکنوں کی بڑی تعداد جی پی او چوک پر نواز شریف اور شہباز شریف کی تصاویر اور مختلف پوسٹرز کے ساتھ موجود رہی جو اپنے رہنماؤں بالخصوص حمزہ شہباز کے حق میں نعرے لگاتی رہی۔
لاہور ہائی کورٹ اور اس کے اطراف میں سخت سیکیورٹی کے انتظامات کیے گئے، سائلین اور وکلاء کی دہری چیکنگ کے بعد انہیں داخلے کی اجازت دی گئی۔
حمزہ شہباز کون ہیں؟
حمزہ شہباز کو مسلم لیگ نون کے پچھلے دور میں پنجاب میں انتہائی اہمیت حاصل رہی، وہ سابق وزیر اعلیٰ پنجاب، مسلم لیگ نون کے موجودہ صدر اور قومی اسمبلی میں قائد حزب اختلاف میاں شہباز شریف کے صاحبزادے اور سابق وزیر اعظم میاں نواز شریف کے بھتیجے ہیں جو 6ستمبر 1974ء کو لاہور میں پیدا ہوئے۔
حمزہ شہباز نےگورنمنٹ کالج لاہور سے گریجویشن کی جبکہ لندن سے ایل ایل ایم کیا۔
الیکشن کمیشن آف پاکستان میں جمع کرائے گئے کاغذات میں حمزہ شہباز نے اپنی 2 شادیوں کا ذکر کیا تھا، ان کی ایک بیوی کا نام رابعہ اور دوسری کا مہر النساء ہے۔
چند ماہ پہلے حمزہ شہباز کو اللہ تعالیٰ نے پہلی اولاد بیٹی سے نوازا جو دل کے عارضے میں مبتلا اور لندن میں زیر علاج ہیں۔
حمزہ شہباز کم عمری میں ہی سیاست میں آ گئے تھے، وہ 19 سال کی عمر میں کالج کے طالب علم تھے، جب انہیں اڈیالہ جیل میں ڈال دیا گیا۔
اکتوبر 1999ء میں حمزہ شہباز کے والد شہباز شریف اور تایا نوازشریف کو جلا وطن کیا گیا تو انہوں نے سیاست میں باقاعدہ حصہ لینا شروع کر دیا۔
وہ اپنے خاندان کے واحد فرد تھے جو پاکستان میں رہے اور خاندان کے کاروباری معاملات بھی دیکھتے رہے۔
حمزہ شہباز این اے 119 لاہور سے 2 بار قومی اسمبلی کے رکن منتخب ہو چکے ہیں، 2018ء کے انتخابات میں وہ قومی اور صوبائی اسمبلی کی 2 نشستوں پر بیک وقت کامیاب ہوئے، بعد میں انہوں نے قومی اسمبلی کی نشست چھوڑ دی اور پنجاب اسمبلی میں قائدِ حزبِ اختلاف بن گئے۔
حمزہ شہباز پر الزام ہے کہ سابقہ دور میں ان کی دولت میں کئی گنا اضافہ ہوا، وہ احتساب عدالت میں ایسے ہی الزامات کا سامنا کر رہے ہیں۔
Source-

Author

Written by Admin

Aliquam molestie ligula vitae nunc lobortis dictum varius tellus porttitor. Suspendisse vehicula diam a ligula malesuada a pellentesque turpis facilisis. Vestibulum a urna elit. Nulla bibendum dolor suscipit tortor euismod eu laoreet odio facilisis.

0 comments: